Зьмеркла. Цёмнасьць агні пале
У зорак грамадзе:
Тайнасьць жуткая — гэт, здаля
У сьвет ідзе, ідзе.
Дагарэла ўжо лучынка,
Спачываці час!
«Добрай ночы» сьпей, дзяўчынка,
Сьпей хоць раз, хоць раз!
Запей нотай сэрцу блізкай
А долі маей,
Быццам маці над калыскай,
Ты запей, запей!
Пей пацехай, пей разгульна,
Душы не скупі;
Мае думкі, жаль няўтульны
Ты прысьпі, прысьпі!
Сьпеўшы песьню, ў ціхамоўку
Без трывогані
На плячо мне звесь галоўку
I засьні, засьні!
Цемнатой нас ночка скрые
Ад злосьці людзкой;
Будзем сьніці залатые
Сны с табой, с табой!..